مصر يا اما يا تيتانيك

( السعادة مش انك تلاقي حاجة تبسطك...لكن انك تتبسط بكل حاجة تلاقيها)*...جميل...و(ان تكون مصري فانت لست سعيدا ولا شقيا...لكنك سعيد بشقائك)**...اجمل...وخد دي من عندي دي بقي...ان تكون مصري فأنت تظل طوال عمرك تحاول عبثا تحويل فسيخ حياتك شرباتا"...تعتقد لسبب لا نعلمه جميعا ان ما نحن فيه هو وضع مؤقت... وتترقب في نفاذ صبر حدث منتظر يحدث من تلقاء نفسه ينهي ذلك الوضع لتفتح اشارة الوطن العالقين فيه وفيها نحن جميعا والدنيا تمشي... بعدما اعتدنا الحياة في بلد مستهلك ذاتيا للوقت والاعصاب والطاقة والامل والمال والبشر...وتصبح قمة الايجابية ان تتحسر علي احوال مصر والمصريين الذين لم يعودوا كذلك ولم تعد تشعر انك منهم...لينتهي بك الحال الي مجرد (تمثال رخام في ميدان عام)***...ابو الهول آخر يشاهد تغيرات المصريين عبر الزمن في صمت وتعايش...لكنك تعرف جيدا ان كل شيء ليس علي ما يرام عندما:

• لما تلمح بالصدفة عناوين الجرايد القومية وانت معدي علي فرشة الجرايد او وانت بتقلب بالصدفة علي نشرة اخبار قناة حكومية مصرية (راجع عناوين الاهرام وروزاليوسف والجمهورية ازاء ازمات غزة والجزائر و نجع حمادي ورغيف العيش)...لتكتشف دورها الرائد في حملة تنظيم الاسرة مع ماما سوزان بالقضاء علي المشكلة من الجذر(تكفيك الصفحة الاولي او مجرد ربع ساعة من النشرة لتضمن لك العقم الكامل مدي الحياة)...وتشعر ان الشعب كله تعرض لجرائم حرب ابان عصور ما قبل القنوات الفضائية الخاصة والصحف المستقلة ...وسط اعلام حكومي مسيطر يفترض مسبقا في قرائه اما انهم يتسمون بالهطل المفرط او انهم متفقين مع الرصين تماما...

• لما تكتشف انه البنت عشان تعيش وتتعايش في مصر قدامها حل من 2...يا تبقي (ذكر) زيادة عن اللزوم...يا تبقي(انثي) زيادة عن اللزوم...

• لما تسمع تصريحات المسئولين في مصر عن (استفزازات جالاوي) و (اعتداءات حماس) و (الغاز المورد للاشقاء في تل ابيب) و (الامن القومي البتنجاني)...مش هاتكلم عن قومية عربية و لااخوة في الاسلام لان واضح ان دي اصبحت مصطلحات تنتمي لعالم الخيال العلمي بعد وفاة الزعيم جمال عبد الناصر...احنا عدينا المرحلة دي من زماااااان...من اول كامب ديفيد لحد ما حبسناهم وسبناهم يتضربوا بالاسلحة المحرمة كأن الحرب لعبة بيلعبوها مع بعض...ومرورا بمقاطعة قادة حماس وعدم السماح للفلسطينيين بعبور معبر رفح في عز حاجتهم للاكل والبطاطين والعلاج ومرورا ايضا بتدمير الانفاق التي تعتبر المتنفس الاخير فوق دماغهم واخيرا جدار العار الفولاذي وشغل العوء مع قافلة شريان الحياة وقائدها المحترم (غصب عن عين التخين) جورج جالاوي...لينتهي الحال لتوسط الامريكان والانجليز للتهدئة بين مصر والفلسطينيين...يا اخي احمد ابو الغيط...كل ما اشوفك ببقي عايز اتكرع...الست اللي حبست قطة هتروح فيها جهنم...فما بالك باللي يحبس شعب واحد ونص مليون...يكفي ان الاسرائيلي اللي هوا اسرائيلي...بيقول سلامو عليكو ويعدي من ايلات لطابا زي الفل كأنه داخل الحديقة الدولية...اختتم الفقرة بتعريف طريف ل(اسرائيل) : (هي فتاة الليل الوحيدة في مجتمع مكون من 21 من العاجزين والشواذ)****

• لما تلاقي- علي العكس -التعامل مع اللعب علي انه حرب...ولنا في مطش الجزاير خير مثال...لما يتضاءل حب الوطن ليصبح حب المنتخب...وتلاقي الدعا شغال لمدة شهر في جميع ربوع المحروسة ان ربنا يكرم ابو تريكة ويجيب اكتر من جونين...كأن البلد زي الفل ومش ناقصها غير مطش كورة وأكلة جمبري وشوية فيتامينات وتقوم علي رجلها وتبقي زي الحصان...في حين انها متنيلة بنيلة والقطر دايس عليها بتاع 3 مرات...مش هتكلم عن اوتوبيسهم اللي اتضرب هنا بالفعل والناس كلها كدبت وقالك ده كتشب مش تعويرة...ولا عن ال 3 اوتوبيسات بتوعنا اللي اتضربوا في السودان والاعلام صورلك انهم ملايين الجزائريين كانوا ورا كل الاوتوبيسات بالسيوف والدبابات وطائرات الاباتشي...مشاهد كثيرة مستوحاة من فيلم 300 اسبرطي نتيجتها الحتمية علي الاقل مئات القتلي وآلاف الجرحي...لكن كل ده ومحدش عندنا مات خد بالك ...غباء من عندهم او احنا باعتين 3000 ادهم صبري يشجعوا متعرفش...ولا هتكلم عن فيديوهات استقبال المصريين للجزائريين في القاهرة اللي استخبت...ولا فيديو المطاوي بتاعهم في الاستاد اللي طلع قديم من الصيف اللي فات...ولا عن الاعلام المصري والجزائري اللي اقذر من بعض...اديب ومدحت شلبي وطارق ابو السعود وشوبير الخ...ولا عن حالة التنصل من العروبة والاعجاب بعلاء مبارك ابن البلد (طبعا ما هي مصر مبارك...وخلي الباقي عشانك) التي اعقبت المطش...يكفي اني اقول ان الشرخ اللي حصل بسبب مباراة كورة وتحريض اعلامي سافل عايزله سنييييين عشان يتصلح

• لما تحس مع الزمن ان ال 15 جنيه اللي كنت بتدخل بيهم من سبع سنين (وصاية) او (ماك) او اي محل وجبات سريعة وتطلب كومبو وانت متطمن الي حد ما...هما نفسهم تعدي بيهم دلوقتي جمب (جاد) بتاع الفول والطعمية وتبقي مقلق هيكفوك تشبع ولا لأ...

• لما تتصدم انو تقريبا نص عمرك بتقضيه في المواصلات سواء سايق او راكب مواصلات غير قايلة للاستهلاك الادمي...ومش قادر تدي معاد ومضطر تكدب ( انا خلاص فاضلي خمس دقايق واكون عندك) لانك لو نوستراديموس بتاع التنجيم شخصيا متقدرش تتوقع هتوصل امتي...حتي لو هتعمل فتك وتنزل الجمعة الصبح هتلاقيهم افتك منك وموقفين الكوبري عشان بيتصلح...

• لما تفقد الامل حتي في المعارضة والمستقلين (راجع حملات ابراهيم عيسي للترويج لاسم علاء مبارك أو البرادعي وحملة المصري اليوم ضد حسن نصر الله او حتي اسلوب ضياء الدين داود في ادارة الحزب الناصري وميل الليبراليين للامريكان و اطاحة الاخوان بالجناح الاصلاحي في الجماعة)...والناس الموهوبة رخصهم مسحوبة علي رأي الاخوة (ارابيان نايتس)...قد تصدق الكدبة من مجرد تكرارها في ودنك كتير...فما بالك لما تسمعها من المعارضين للنظام...عندها تتحول الكدبة في عقلك لعقيدة راسخة لا تقبل النقاش... في ظل قلة وعي جيل منزوع الثقافة والانتماء...

• لما تلاقي نص المجتمع بيفترض ان البنت المش محجبة هي بالقطع واحدة ماشية غلط...حتي لو محتشمة فهي في رأيه مجرد عملية تهريب محكمة لعاهرة متخفية بالداخل...والنص التاني من المجتمع بيعتبر المحجبات سبب تخلف الامة...الي النصين معا::انتو مال اهلكو؟؟؟

• لما تشعر ان اي تغيير هو دائما للاسوأ...لتندفع الصخرة بصورة اسرع في اتجاه الهاوية...شالوا هلال جابوا احمد زكي بدر وشالوا عبيد جابوا نظيف...مشيها نظيف...لتفقد الامل تماما في ان تنصلح الامور ذاتيا من تلقاء نفسها بدون تدخل شعبي طاريء...

• لما تسمع ان ابراهيم سليمان وزير الاسكان السابق (أضحية الانتخابات القادمة) واخد الاف الامتار و الفدادين من الاراضي والشاليهات لحساب اهله في عود احمد لنظام الاقطاع...في حين ان مجرد بصة سريعة علي اسعار الشقق في الجرنان كفيلة بجعل طموح اي شاب في الزواج وامتلاك حتي عشة فراخ اشبه بحلم السبكي في الفوز بجائزة الاوسكار عن فيلم (حاحا وتفاحة)...بل انهيار نفس الشاب امام جميع ما يحمل تاء الانوثة حتي لو كانت (مكتبة)...

• لما تلاقي حسن شحاته بيستفزك باختياراته وسايب ناس زي حمص وميدو وابراهيم سعيد...وواخد عبد الشافي ورءوف وفتح الله...وتلاقي عدلي القيعي مش سايب حد غير وماضي معاه...لدرجة انك خايف تنزل والدك من البيت لا يرجع ومعاه عقد من النادي الاهلي...

• لما تشك في اي قضية رأي عام انها متلبسة لحد ملوش ايتها علاقة بالموضوع لتهدئة الجو(راجع قضايا بني مزار ومقتل هبة ونادين واخيرا حادثة نجع حمادي)...

• لما بلد عربية اسلامية تحتل بالكامل ويستشهد منها فوق المليون وتغتصب النساء وتحرق المساجد وتدمر الآثار العريقة ويسرق البترول...وتحس من التعامل الحكومي والشعبي انها تنتمي لمجرة اخري غير بتاعتنا...

• لما تلاقي اعلي فئة في مصر اعلاميا وماديا...هما الممثلين ولعيبة الكورة وحرامية الحزب الوطني...

• لما تقرا اي كتاب اجنبي (حتي لو لكاتب معتدل زي دان براون) او تشوف اي فيلم امريكاني...وتلاقي الفيلم حتي لو بيتكلم عن الفضاء سنة 3000...بيدي كتف للعرب والمسلمين وبيشتمهم حتي لو بطريقة غير مباشرة...وقلة معرفتهم الصحيحة بينا ده بصراحة غباء مشترك من الطرفين...
  

• لما تكتشف ان الشعب المصري المتسامح القائم علي تعدد الاديان اصبحت كلمات مثل ( شيعي) عنده تكافيء كلمة كافر...بينما التاريخ المصري الفاطمي (بناة القاهرة) هو تاريخ شيعي...والازهر بني في الاصل لنشر المذهب الشيعي في العراق وايران السنيين...وبينما ايضا اختلاف المذهبين هو في الاساس اختلاف سياسي لا خلاف ديني...والاهم ان كل هذة الالتباسات والشوائب هي بذور يلقيها الغرب في النفوس الهشة ليتركها تنمو في بيئة صالحة تماما...لتصبح النتيجة اوطان مفككة وتاريخ ضائع...

• لما تتأمل وتندهش ان الناس بقت عاملة زي سواقين المكروباص...والقاهرة نفسها بقت عبارة عن ميكروباص كبير شويتين...مدينة منهكة بفعل التوتر والزحام والاندفاع والعشوائية والقلق والسربعة... وكافة الظواهر الاخري الملحوظة في التجربة المكروباصية...حتي التنوع في اشكال البشر الناجم عن كونها العاصمة التي تتكدس بالسكان والسيارات والمصالح والخروجات وفرص العمل والقلق والخوف...وعلي المقيمين خارجها(سكان الاقاليم) خبط دماغهم في الحيط او البحث عن وطن بديل...

• لما تلاقي نجوم هذا الزمن هم الاخ نجم الجيل (شعر الصدر حسين) و مثلث الرعب (هيفاء-نانسي-اليسا) والمدرب العالمي (ابراهيم الفقي) والرجل الحديدي(احمد عز) والزعيم (عادل امام) والمتألق دائما (معتز الدمرداش) وبقية شلة الكائنات الزلالية اياها..
  

****************************
والي ان يتغير الوعي ويقضي الله امرا كان مفعولا::
أنا لسه قااااااادر...في الحزن افرح هيييييييييييييييييه****
____________________________________________________________
* عمر طاهر
**من كتاب (ما فعله العيان بالميت)لبلال فضل
*** من تدوينة (نرفزة) للصديق اسلام عطيه
**** من رسالة قاريء لبلال فضل في جريدة الدستور
*****عن اغنية (الفرح شاطر) للكينج...محمد منير