بيني وبيني
بيني وبيني انا بحبها اوي...وحضنها واحشني لدرجة العبط...
- بيني وبيني انا مندهش من سرعة رتم سيناريو العلاقة...من اربعة وعشرين ساعة نبقي ملناش علاقة ببعض...ودلوقتي قاعدين بنغني ونضحك ونمد في الوقت...دهشة انك تبقي عايش في واقع من يوم واحد كان حلم...
- بيني وبيني انا استمتعت معاها زي زمان...وحسيت احساس اول مرة خرجنا سوا...والجو الشتوي وطول الطريق لمحطة المترو والمكان المفضل في الاستراحة والشوكولاته كلهم تأمروا لصالحي في سيمفونية نادرا ما تحدث لتكون النتيجة...يوم رائع
- بيني وبيني انا بتضايق لما بتتحاشي اي تقارب نفسي او جسدي...واما احس من كلامها او اشوف في عينيها حاجات غير اللي مستني اشوفها...ساعتها بكتم كلام كتير جوايا واحس ان ملوش ام اي لازمة...
- بيني وبيني متضايق من حاجات كتير انا عملتها...وعارف ان عيب الحياة الرئيسي انها معتمدة علي الاحداث السابقة...مسلسل درامي متصل مش منفصل للاسف...وان نرفزتي اللي كانت بتزيد مع كل حاجة تحصل تضايقني منها كانت عاملة زي سلم كل يوم بطلع عليه سلمة لحد ما جبت اخره وجاب اخري...
- بيني وبيني عارف ان لها شخصيتين ...واحدة فاهمها اوي وفيه بيننا تفاهم روحي عالي جدا وبحس اننا اطفال بنلعب لما بتطلع...وواحدة مبفهمهاش خالص وبحاول اتعايش لما بتظهر علي السطح
- بيني وبينها انا لا مندهش ولا متضايق ولا متنرفز...تارك لها حرية الاختيار... لكن تغلبني طبيعة شخصيتي التلقائية فابدو لها ككتاب مفتوح وكواليسي مذاعة مباشرة بدون اي مونتاج يذكر...وغصب عني بيطلعوا الكلمتين اول ما اشوفها...وحشتيني اوي
ليست هناك تعليقات:
إرسال تعليق