لساه عبيط

قلبي العبيط لساه بيتعامل مع العالم بحسن نية حتي لو العالم مردش المعاملة بنفس الطريقة...
لساه بيقتنع بالمعطيات الظاهرية وبيصدق للوهلة الأولي الإحترام واللباقة في الكلام ويمشي معاه للآخر عشان يكتشف إن أحيانا أو غالبا الأكثر فظاظة و تلقائية هم الأكثر صدقا... التانيين عندهم القدرة إنهم يغلفوا سخافاتهم في شكل حلو مش أكتر...
لساه بيراهن عالحصان الخسران ويتشعبط في الأمل كنوع من محاولة لإثبات صحة وجهة نظره حتي لو إستهلك أعصابه لحد آخر نقطة في الإزازة...
لساه بيهتم بناس ويديهم كتير من وقته و يحاول قدر الإمكان يتلافي أي أخطاء إرتكبها في علاقاته القديمة عشان في النهاية يكتشف مدي صحة مقولة ( loving the wrong person the right way wont make any difference)...
لساه بيرفض وسط برد عاطفي قارص أي لفتة حنينة أو خدمة اتقدمتله بتكسر القاعدة من أي حد مش مطلوب منه يعمل كده.... لأنها ببساطة بتفكره وبتأكدله قد إيه اللي مطلوب منهم الكلام ده وماعملوهوش غلطانين في حقه...بيتحول ( زي التعبير العبقري لنرمين نزار ) لواحد من مصابي الحروق... لا يقبل أي نوع من التلامس...
لساه بيسلم رقبته لناس ويديهم كامل ثقته ويمكن يديهم أعذار لو طلعوا مش قدها ويزعل بعدين من غدر الطعنات اللي بيتفاجيء بيها في ضهره من أكثر ناس واثق إنهم هم اللي مأمنينه ومفيش ملمح خيانة من ناحيتهم...
لساه بيشوف جزء من الصورة وميفهماش في وقتها وبعد ما يلبس يكتشف قد إيه كان غبي وقد إيه العلامات اللي كانت في طريقه طول الوقت كانت واضحة لدرجة إنو مخدش باله منها....لساه دايس فرامل وبنزين وبيستغرب هيا ليه مش ماشية...بيبذل مجهود رياضي عنيف وفي نفس الوقت يمارس كل أنواع العادات الحياتية اللي ممكن تزود الوزن...بيتعامل بطريقة مدحت صالح في أغنية المليونيرات مع الوقت والفلوس...ويرجع يضرب نفسه بالجزمة اما يتصدم بإنعدام السيولة المادية والزمنية....
لساه بيستنا حاجات تحصل عشان يبدأ حاجات ناويها وبيخاف يخسر أو ميؤديش بشكل مثالي مع إنو عارف إنو أهم الحاجات اللي خسرها في حياته كان سببها الخوف من الخسارة وعدم المحاولة ...
لساه بيواجه نفس المشكلة في ترتيب أولوياته ... ويفكر نفسه كل شوية بجملة فيلم فيلليني الإيطالي الأشهر (otto e mezzo )... من الأفضل أن تهدم لا أن تبني عندما تفشل في تحقيق أساسياتك...
لساه متخيل إن المبلغ الكبير هيصغر لو قسمه علي دفعات متتالية يفصل بينها يوم أو يومين... ويرجع يشحن كارت تليفون يكفيه كام مكالمة و بعدها يشحن تاني يوم...بنزين يمشيه عشرين كيلو وهناك يدور علي أي محطة تانية يمون منها... يقف قدام مكنة الإي تي إم كل 3 تيام يسحب مبلغ صغير ....
لساه بايع حياته بشكل كامل للتوتر والقلق والنرفزة و يتخنق جدا إزاي العالم فيه كمية الندالة والوطيان والوساخة اللي عند البعض...
لساه عارف كل الكلام ده ومع ذلك بيجيد تكرار أخطائه بحذافيرها بكل ثقة وأريحية...ويلف في نفس الدايرة

********************

قلبى العبيط..

الحمد لله

لسـَّاه عبيط...

مع انه عارف ..

انه مش هيسكر

حتى لو يشرب محيط...

عمال يكربع فى ازازه الدراما

ويمز بالحواديت

قلبى العبيط...

فلينه واقعه

فى ازازه نبيت...

عن قصيدة لخالد كساب تحمل نفس الإسم